Noyabrın 22-də Azərbaycan Milli Elmlər Akademiyasının Rəyasət Heyəti, Gənc Alim və Mütəxəssislər Şurası (GAMŞ) və Azad Həmkarlar İttifaqının (AHİ) birgə təşkilatçılığı ilə "Müasir elm – gənclərin baxışı ilə" adlı elmi-praktik konfrans keçirilib.
     Tədbiri giriş sözü ilə açan AMEA-nın vitse-prezidenti, akademik İsa Həbibbəyli Azərbaycan elminin inkişaf etdiyini, qloballaşan dünyanın elm sisteminin ayrılmaz tərkib hissəsinə çevrildiyini bildirib. Akademik bu prosesin əsasında Azərbaycan Respublikasının Prezidenti İlham Əliyevin elmə böyük diqqət və qayğısının dayandığını qeyd edib: "Hazırda Azərbaycan elmində ciddi islahatlar aparılır. Həyata keçirilən islahatlarda elmi fəaliyyətin yeni əsaslarla təşkili və idarə olunması, ölkənin intellektual resurslarının səfərbər edilməsi, müxtəlif elm sahələrinin inkişafı, qabaqcıl texnologiyaların tətbiqi, elmlərarası əlaqələrin daha da inkişaf etdirilməsi, elmi infrastrukturun təkmilləşdirilməsi, elm və təhsilin inteqrasiyası, elmi fəaliyyətin yeni meyarlar əsasında qiymətləndirilməsi, elmin özünün prioritet fəaliyyət sahəsinə çevrilməsi və digər məqamlar xüsusi aktuallıq kəsb edir".
     Sonra çıxış edən AMEA-nın vitse-prezidenti, akademik Dilqəm Tağıyev, Akademiyanın gənclər siyasətinin uğurla həyata keçirildiyini bildirib. Cari ilin AMEA üçün kifayət qədər səmərəli və məhsuldar olduğunu deyən akademik gənc alim və mütəxəssislərin yaradıcı fəaliyyətlərinin stimullaşdırılması, xarici ölkələrin elm mərkəzlərinə ezam olunması istiqamətində mühüm addımlar atıldığını diqqətə çatdırıb.
Dekabrın 15-də ölkəmizdə ilk dəfə "Azərbaycan gənc alimlərinin I Qurultayı"nın keçiriləcəyini söyləyən Dilqəm Tağıyev qeyd edib ki, möhtəbər tədbirə hazırlıq, o cümlədən respublikada fəaliyyət göstərən gənclərlə bağlı elmi təşkilatların birgə fəaliyyəti və koordinasiya problemləri, həmçinin elm, təhsil və innovasiya sahələrinin inkişafında multidissiplinarlığın bərqərar olunması baxımından bugünkü konfransın mühüm əhəmiyyətə malik olduğunu vurğulayıb.
     Tədbirdə Rəyasət Heyəti aparatının Elm və Təhsil İdarəsinin rəisi, AMEA-nın müxbir üzvü Əminağa Sadıqov çıxış edib. Natiq ölkəmizdə, o cümlədən  Akademiyada gənclərin elmi fəaliyyətlə məşğul olması üçün yaradılmış münbit şəraitdən, bu gün dünya elminin qarşısında duran əsas problemlərdən, gənc alimlərin bu problemlərin həllində iştirakından, fundamental elmi biliklərin innovativ layihələrə transformasiyasından, gənclərin beynəlxalq elmi layihələrdə iştirak imkanlarından danışıb.
     Konfransda AHİ-nin sədri, hüquq üzrə elmlər doktoru Habil Qurbanov çıxış edib. Gənclərə dövlət tərəfindən yüksək qayğı göstərildiyini deyən natiq Akademiyada da bu siyasətin uğurla həyata keçirildiyini vurğulayıb. Qeyd edib ki, GAMŞ fəaliyyət göstərdiyi müddətdə bir sıra mühüm işlər görüb, respublika və beynəlxalq səviyyəli elmi tədbirlər keçirib. H.Qurbanov AHİ-nin şuraya hər zaman maddi və mənəvi dəstək göstərdiyini, qurumun bundan sonra da köməkliyini əsirgəməyəcəyini vurğulayıb.
     Bakı Dövlət Universitetinin Tələbə Həmkarlar İttifaqı Komitəsinin sədri, hüquq üzrə fəlsəfə doktoru Daşqın Qənbərov çıxış edərək təmsil etdiyi qurum adından iştirakçıları salamlayıb və konfransın işinə uğurlar arzulayıb. D.Qənbərov gənclərə dövlət qayğısından və bu istiqamətdə görülən işlərdən danışıb. Azərbaycanda sağlam, milli düşüncəyə malik gəncliyin formalaşdığını deyən natiq tədbirin böyük əhəmiyyətə malik olduğunu qeyd edib.
     Daha sonra GAMŞ-ın sədri, dosent Famin Salmanov çıxış edərək konfransın akademik Akif Əlizadənin təşəbbüsü ilə təşkil olunduğunu bildirib. F.Salmanov vurğulayıb ki, tədbirin məqsədi istedadlı gənclərin elmə cəlb olunması, onların karyera yüksəlişində problemlərinin həlli yollarını, eləcə də prioritet istiqamətlər üzrə inkişaf perspektivlərini müəyyənləşdirmək üçün respublikada fəaliyyət göstərən elmi-tədqiqat və ali təhsil müəssisələrinin, aidiyyəti dövlət və özəl qurumların, elm və təhsilin inkişafına dəstək verən fondların, sahibkarlıq və media subyektlərinin rəsmi nümayədələrinin iştirakı ilə faydalı müzakirəyə nail olmaqdır. Qeyd edib ki, konfrans çərçivəsində akademik institutların, elmi-istehsalat müəssisələrinin və digər müvafiq qurumların gənc alim və mütəxəssislərin iştirakı ilə ayrıca interaktiv diskussiyalar təşkil olunacaq.
     Rəsmi açlışdan sonra konfrans öz işinə interaktiv müzakirələrlə davam edib. Müzakirələr "Elmi məktəblər və fundamental elmi axtarışlar", "Yüksək Texnologiyalar Parkı – innovativ ideyaların real məkanı", "Elm, təhsil və innovasiya üçbucağı: inkişafın vəhdət modeli" və "Azərbaycanda elmi təşkilatların birgə fəaliyyəti və koordinasiya problemləri" mövzulu panellərdə aparılıb.