Arxiv
İtaliya Tədqiqat Şurasının Davamlı Bitki Mühafizə İnstitutu ilə Botanika İnstitutu arasında elmi əlaqələr genişlənir
03.07.2018

      AMEA Botanika İnstitutunun direktoru, akademik, prof. Validə Əli-zadə və Mikologiya laboratoriyasının müdiri, AMEA-nın professoru, b.ü.e.d. Dilzarə Ağayeva İtaliya Milli Tədqiqat Şurasının (İMTŞ) Davamlı Bitki Mühafizə İnstitutunda səfərdə olmuşlar. Səfər zamanı İtaliya tərəfindən İMTŞ-nın Florensiya bölməsinin Davamlı Bitki Mühafizə İnstitutunun direktoru, prof. Cian Paola Akkotto və institutun baş elmi işçisi, Dr. Biancaelena Maserti ilə birlikdə institutlararası ikitərəfli əməkdaşlığı gücləndirmək üçün hər iki institutun əsas fəaliyyət sahələri və iş perspektivləri barədə ətraflı müzakirə aparılmış, gələcək əməkdaşlıq istiqamətləri müəyyən edilmiş və biomüxtəlifliyin mühafizəsində müasir çağırışlara cavab verən tədqiqatların aparılmasına dair ikitərəfli müqavilə bağlanmışdır.

      Həmçinin AMEA-İMTŞ çərçivəsində yerinə yetirilən “Azərbaycanda şabalıd ağaclarının (Castanea sativa Mill.) sağlamlıq statusunun qiymətləndirilməsi: şabalıd xərçəngi və assosiasiyada olan göbələk xəstəlikləri” layihəsi çərçivəsində görülən işlərin nəticələri və gələcək çap işləri müzakirə edilmişdir.