Fevralın 9-da AMEA-nın Molekulyar Biologiya və Biotexnologiyalar İnstitutunun Elmi şurasının hibrid formatda növbəti iclası keçirilib. İclası giriş sözü ilə açan AMEA-nın vitse-prezidenti, İnstitutun baş direktoru akademik İradə Hüseynova şura üzvlərini gündəlikdəki məsələlər barədə məlumatlandırıb. İclasda institutun Bitki biotexnologiyası laboratoriyası üzrə vakant olan laboratoriya müdiri vəzifəsinin tutulması üçün müsabiqədə iştirak edən b.ü.f.d., dosent Mahirə Məmmədovanın namizədliyi müzakirə olunaraq onun laboratoriya müdiri vəzifəsinə təsdiq olunması məqsədəuyğun hesab olunub, bununla əlaqədar AMEA Biologiya və Tibb Elmləri Bölməsi qarşısında vəsatət qaldırılması haqqında qərar qəbul edilib. Sonra İnstitutun Bioadaptasiya laboratoriyasının  aparıcı elmi işçisi, biologiya üzrə fəlsəfə doktoru Samirə Rüstəmovanın Elmin İnkişafı Fondu tərəfindən maliyyələşdirilən "Buğdada quraqlığa davamlılığa cavabdeh açar genlərin ekspressiyası ilə metabolom arasında qarşılıqlı əlaqənin müəyyən edilməsi əsasında stresə davamlılıq mexanizminin konseptual modelinin işlənib hazırlanması" mövzusunda layihə üzrə tədqiqatları davam etdirmək məqsədilə Almaniyanın Bonn Universitetinin Bitkiçilik Elmi və Resurslarının Mühafizəsi İnstitutunda (INRES) Bitki Genetikası və Biotexnologiyası Departamentinə ezam edilməsi, 2021/2022-ci tədris ilində qış imtahan sessiyasını uğurla başa vurmuş II kurs magistrantların elmi tədqiqat və elmi-pedaqoji təcrübələrinin keçirilməsinin təşkili məsələsi və digər təşkilati məsələlər müzakirə olunub. Bununla da Elmi şuranın 02 saylı iclası öz işini yekunlaşdırıb.