Arxiv
Biologiya və Tibb Elmləri Bölməsinin Elmi şurasının iclası keçirilib
25.02.2022

AMEA-nın Biologiya və Tibb Elmləri Bölməsinin (BTEB) Elmi şurasının iclası keçirilib.

İclası giriş sözü ilə açan AMEA-nın vitse-prezidenti, bölmənin Elmi şurasının sədri, akademik İradə Hüseynova iştirakçıları gündəlikdəki məsələlərlə tanış edib. Akademik iştirakçılara AMEA-nın Rəyasət Heyətinin “Azərbaycan Respublikasında 2022-ci ilin “Şuşa İli” elan edilməsinə dair AMEA-nın Tədbirlər planı haqqında” 2 fevral 2022-ci il tarixli qərarı haqqında danışıb. Akademik İradə Hüseynova bu qərarın icrası ilə əlaqədar Biologiya və Tibb Elmləri Bölməsinin üzərinə düşən vəzifələrə diqqət çəkib və ilk növbədə cari ilin iyun-iyul aylarında “Şuşa şəhəri və ətraf ərazilərin biomüxtəlifliyi, torpaq və su ehtiyatları: gələcəyə baxış” mövzusunda beynəlxalq konfransın yüksək səviyyədə keçirilməsi üçün bütün qüvvələrin səfərbər edilməsinin vacibliyini vurğulayıb.

Qərarda nəzərdə tutulan digər tədbirlər arasında “Şuşa rayonu və ətraf ərazilərin nadir və itmək təhlükəsində olan və Azərbaycanın “Qırmızı kitab”ına düşmüş bitki müxtəlifliyi ilə bağlı sərgi və seminarın təşkili” məsələsinin də olduğunu deyən natiq daha sonra “Qırmızı kitab”ın III nəşrinin hazırlanması ilə bağlı görülən işlər, aparılan elmi tədqiqatlar, müvafiq işçi qruplarının son günlərdə baş tutmuş toplantıları barədə iştirakçıları məlumatlandırıb. Akademik İradə Hüseynova Azərbaycan Respublikası Ekologiya və Təbii Sərvətlər Nazirliyinin rəhbərliyi, əməkdaşları və mütəxəssisləri ilə “Qırmızı kitab”ın III nəşri ilə bağlı intensiv məsləhətləşdirmələrin aparıldığına da diqqət çəkib.

İclasda daha sonra AMEA-nın Botanika və Dendrologiya institutlarının Elmi şuralarının yeni tərkibləri müzakirə edilib və onların təsdiqi ilə bağlı AMEA-nın Rəyasət Heyəti qarşısında məsələ qaldırılması haqqında qərar qəbul olunub.

Eyni zamanda Botanika İnstitutunun 2021-ci il üçün elmi-tədqiqat planında redaktə xarakterli dəyişikliklər edilməsi ilə bağlı da müvafiq qərar qəbul edilib.

İclasda AMEA-nın Molekulyar Biologiya və Biotexnologiyalar İnstitutunun Hüceyrənin membran sistemləri laboratoriyasının müdiri, biologiya elmləri doktoru, professor Səftər Süleymanov 70, Botanika İnstitutunun baş direktoru, biologiya elmləri doktoru, professor Səyyarə İbadullayeva isə 65 illik yubileyləri ilə əlaqədar BTEB-in Fəxri fərmanları ilə təltif ediliblər.

Sonda Biologiya və Tibb Elmləri Bölməsinin fəaliyyəti ilə bağlı bir sıra digər məsələlərə baxılaraq müvafiq qərarlar qəbul olunub.